អ្នកនាំពាក្យក្រសួងព័ត៌មាន ក្រើនរំលឹកឲ្យប្រុងប្រយ័ត្នមាតិកាព័ត៌មាន និងរូបភាពដែលប៉ះពាល់ដល់សន្តិសុខជាតិ និងទំនាក់ទំនងអន្តរជាតិ
- ព័ត៌មានជាតិព័ត៌មានផ្សេងៗ
- May 31, 2025
ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លើកឡើងទៅកាន់អ្នកសារព័ត៌មាន និងអ្នកប្រើប្រាស់បណ្ដាញទំនាក់ទំនងសង្គម ឲ្យមានការប្រុងប្រយ័ត្នក្នុងការផលិត ផ្សព្វផ្សាយ និងចែករំលែកមាតិកាព័ត៌មាន ពាក់ព័ន្ធនឹងវិវាទប្រទេស និងប្រទេស និងសន្តិសុខជាតិ។ ខាងក្រោមនេះ គឺជាសារទាំងស្រុងរបស់ឯកឧត្ដមអ្នកនាំពាក្យក្រសួងព័ត៌មាន ដែលបានឆ្លើយតបនឹងអង្គភាពសារព័ត៌មានត្រយង៖
យោងតាមច្បាប់ស្ដីពីរបបសារព័ត៌មាន អ្នកសារព័ត៌មានមានសិទ្ធិទទួល / ផ្សាយព័ត៌មាន ដែលមិនបង្កមហន្តរាយដល់សន្តិសុខជាតិ មហន្តរាយដល់ទំនាក់ទំនងជាមួយប្រទេសដទៃ ចៀសវាងផ្សាយព័ត៌មានដែលមានគ្រោះថ្នាក់ដល់មន្ត្រី អនុវត្តច្បាប់ ឬត្រូវបំពេញបេសកកម្មរបស់ខ្លួន។
ក្នុងន័យនេះការរាយការណ៍ ស្ដីពីបញ្ហាសន្តិសុខជាតិ ដោយសារព័ត៌មានអាជីពក្ដី មិនអាជីពក្ដី ឬការចែកចាយព័ត៌មានលើបណ្ដាញសង្គមក្ដី ចាំបាច់ណាស់ត្រូវតែធ្វើឡើងដោយផ្អែកលើ ព័ត៌មាន ដែលបានមកពីប្រភពផ្លូវការរបស់ក្រសួងស្ថាប័ន មានសមត្ថកិច្ច ឬអាជ្ញាធរពាក់ព័ន្ធក្នុងវិស័យ និងត្រូវផ្សាយដោយគោរព ក្រមសីលធម៌វិជ្ជាជីវៈ ឲ្យបានហ្មត់ចត់។
ដូច្នេះ ការរាយការណ៍លើប្រធានបទ «សន្តិសុខជាតិ» ត្រូវឈរលើមូលដ្ឋាន នៃភាពច្បាស់លាស់ ផ្ដល់ព័ត៌មានមានភាពប្រាកដប្រជា មានក្រមសីលធម៌ត្រឹមត្រូវ ហើយត្រូវព្យាយាមសហការស្វែងរកការបញ្ជាក់ និងផ្ដល់ព័ត៌មានពីក្រសួងស្ថាប័ន សមត្ថកិច្ចពាក់ព័ន្ធ ដើម្បីធានាភាពអាចជឿទុកចិត្តបានសម្រាប់សាធារណជន និងធានាថា មិនបង្កបញ្ហាដល់ប្រជាជន សង្គមជាតិ តែត្រូវចូលរួមបញ្ចៀសរាល់ហានិភ័យនានា ដែលអាចបង្កឱ្យមានទំនាស់ទាំងផ្ទៃក្នុងប្រទេស ឬជាមួយប្រទេសដទៃ ដែលយើងត្រូវរក្សាទំនាក់ទំនងល្អ និងកិច្ចសហប្រតិបត្តិការយូរអង្វែង។ យើងត្រូវលើកកម្ពស់ការផ្សព្វផ្សាយព័ត៌មានពិតក្នុងសង្គម និងចូលរួមទប់ស្កាត់រាល់ការចេញផ្សាយបែបបំភ្លៃ បំផ្លើស ការក្លែងបន្លំព័ត៌មានដោយចរិតញុះញង់ និងមានបង្កប់របៀបវារៈទុច្ចរិតនៅពីក្រោយរបស់ក្រុមជាតិនិយមជ្រុល ក្នុងការបង្កភាពអសន្តិសុខសង្គម បំផ្លាញសន្តិភាព និងធ្វើឱ្យបាត់បង់ទំនុកចិត្តលើការដឹកនាំរបស់រាជរដ្ឋាភិបាល។
ចេញពីព្រឹត្តិការណ៍ថ្មីៗនេះ អ្នកសារព័ត៌មានគ្រប់រូបត្រូវដើរតួនាទីសំខាន់ខ្លាំងឡើងក្នុងការធានាថាការផ្សព្វផ្សាយព័ត៌មានរបស់ខ្លួនមិនបង្កឱ្យមានការភាន់ច្រឡំសាធារណៈ ដោយសារការផ្ដល់ព័ត៌មានមិនគ្រប់ជ្រុងជ្រោយ ឬមិនបានស្រង់ព័ត៌មានពីប្រភពផ្លូវការរបស់ក្រសួង សា្ថប័ន និងសមត្ថកិច្ចពាក់ព័ន្ធនោះ។ អ្នកសារព័ត៌មាន មានសិទ្ធិក្នុងការរាយការណ៍ ផ្ដល់ព័ត៌មានជូនប្រជាជន តែអ្នកសារព័ត៌មានក៏មានករណីយកិច្ចចាំបាច់ និងកាតព្វកិច្ចផងដែរ ក្នុងការត្រូវធ្វើតុល្យភាពរវាងការផ្សាយព័ត៌មានជូនសាធារណជន និងភាពចាំបាច់នៃការការពារព័ត៌មានពាក់ព័ន្ធនឹង «សន្តិសុខជាតិ» ដែលជាតួនាទីអ្នកសារព័ត៌មានត្រូវចូលរួម ដោយត្រូវរាយការណ៍ដោយឈរលើភាពសុចរិត ស្មោះត្រង់ ភាពត្រឹមត្រូវ មិនលម្អៀង និងជៀសវាងការផ្សព្វផ្សាយពាក្យចចាមអារ៉ាម ឬការនិយាយ ឬចែកចាយតៗគ្នា ឬការស្មានៗ ដោយគ្មានប្រភពច្បាស់លាស់ ជាពិសេសនៅពេលរាយការណ៍ព័ត៌មានពាក់ព័ន្ធនឹងការងារស៊ើបការណ៍ ការអង្កេត ប្រតិបត្តិការយោធា អាយុជីវិតរបស់យោធា ឬប្រភេទព័ត៌មានសម្ងាត់ជាតិ។ ការរាយការណ៍ទាំងអាជីព និងមិនមែនអាជីព ត្រូវធ្វើឡើងដោយមានទំនួលខុសត្រូវខ្ពស់ ដើម្បីចូលរួមធានាសណ្ដាប់ធ្នាប់ ស្ថិរភាព និងសន្តិសុខសង្គម ដោយចៀសវាងការបំផ្លើស បំភ្លៃ ឬការកាឡៃព័ត៌មានប្រាសចាកពីការពិត។
សូមអំពាវនាវដល់អ្នកសារព័ត៌មាន អ្នកសារព័ត៌មានអាជីព មិនមែនអាជីព អ្នកចែកចាយព័ត៌មានលើបណ្ដាញសង្គម ឱ្យបង្កើនការទទួលខុសត្រូវក្នុងការផ្សព្វផ្សាយ ចែកចាយព័ត៌មាន ដោយជានិច្ចជាកាលត្រូវប្រកាន់ខ្ជាប់នូវក្រមសីលធម៌វិជ្ជាជីវៈ និងត្រូវមានមនសិការទទួលខុសត្រូវ ស្រលាញ់ប្រទេសជាតិ ប្រជាជន និងត្រូវបង្កើនការប្រុងប្រយ័ត្នខ្ពស់នៅពេលរាយការណ៍ព័ត៌មាន ស្ដីពីសន្តិសុខជាតិ ត្រូវគិតគូរដល់ផលប៉ះពាល់ដែលអាចកើតមានឡើង និងផលវិបាកក្នុងរយៈពេលវែងចេញពីការរាយការណ៍នោះ។ ពាក់ព័ន្ធនឹងសន្តិសុខជាតិ គឺសូមអំពាវនាវឱ្យបង្កើនការសហការ ដើម្បីស្វែងរកការផ្ដល់ព័ត៌មាន និងការបញ្ជាក់ពីប្រភពផ្លូវការត្រឹមត្រូវ ត្រូវផ្ទៀងផ្ទាត់ព័ត៌មានជាមុន និងមិនត្រូវឱ្យមានការបែកធ្លាយព័ត៌មានជាតិ ឬការសម្ងាត់ជាតិដោយប្រការណាមួយឡើយ ព្រោះវានឹងបណ្ដាលឱ្យកើតមាននូវព្យសនកម្ម និងមហន្តរាយដល់ប្រជាជន សន្តិសុខ និងសង្គមជាតិទាំងមូល៕
