កងពលតូចថ្មើរជើងលេខ៥១ បានធ្វើការអប់រំផ្សព្វផ្សាយ វិធានការ ការពារជំងឺអង់ត្រាក់ ឬជំងឺឈាមខ្មៅ ដល់នាយទាហាន នាយទាហានរង និងពលទាហាន

(បន្ទាយមានជ័យ)៖ ថ្ងៃពុធ ទី៧ ខែឧសភា ឆ្នាំ២០២៥ នៅទីបញ្ជាការ កងពលតូចថ្មើរជើងលេខ៥១ បានធ្វើការអប់រំផ្សព្វផ្សាយ អំពីវិធានការ ការពារជំងឺអង់ត្រាក់ ឬជំងឺឈាមខ្មៅ ដែលបង្កឡើងដោយបាក់តេរីស្ព័រ ដោយសារការបរិភោគសាច់ដែលមានមេរោគអង់ត្រាក់ (សាច់គោឆៅ) ដោយលោកវរសេនីយ៍ត្រី ង៉ាត ងួន នាយការិយាល័យសុខាភិបាលជូនដល់ នាយ-ពលទាហាន និងតាមបណ្ដាវរសេនាតូច ចំណុះកងពល។

នាពេលថ្មីៗនេះមានការផ្ទុះឡើងនៅប្រទេសជិតខាងនិងបណ្ដាប្រទេសមួយចំនួន នូវជំងឺអង់ត្រាក់ ឬហៅថាពិសធ្យូង នៅលើមនុស្ស និងនៅលើសត្វហៅថាជំងឺអង់ត្រាក់ ឬជំងឺឈាមខ្មៅ បង្កឡើងដោយប៉ាតារីដែលបង្កើតស្ព័រ(spore-forming bacillus asthracis)ជាប្រភេទជំងឺឆ្លងពីសត្វទៅមនុស្ស។ សត្វដែលចម្លងជំងឺនេះសំខាន់ៗរួមមាន៖ គោ ក្របី ចៀម ពពែនិងសត្វព្រៃ។

មនុស្សអាចឆ្លងជំងឺនេះតាមរយៈការប៉ះពាល់ផ្ទាល់ទៅនឹងសត្វដែលមានរោគសញ្ញាអង់ត្រាក់, ការបរិភោគសាច់សត្វដែលមានជំងឺនេះ ជាពិសេសសាច់ឆៅ ឬសាច់ដែលចម្អិនមិនបានល្អ និងតាមរយៈការដកដង្ហើមស្រូបចូលនៅពពួក Spore ដែលបង្កជំងឺចូលទៅក្នុងផ្លូវដង្ហើម ហើយជំងឺនេះអាចប៉ះពាល់ដល់អាយុជីវិតសម្រាប់អ្នកដែលបានឆ្លង។

លោកនាយការិយាល័យសុខាភិបាល បានផ្តាំផ្ញើរដល់មេបញ្ជាការគ្រប់កងឯកភាព ត្រូវផ្សព្វផ្សាយដល់យោធិនគ្រួសារយោធិនឲ្យបានគ្រប់ៗគ្នា ដើម្បីធ្វើយ៉ាងណាការពារទប់ស្កាត់ និងត្រូវអនុវត្តឲ្យបានខ្ជាប់ខ្ជួនតាមការណែនាំរបស់ក្រសួងសុខាភិបាល។