តំបន់អភិវឌ្ឍន៍ យោធភូមិភាគទី៥ រៀបចំកិច្ចប្រជុំបូកសរុបលទ្ធផលការងារយោធាឆ្នាំ២០២៤ និង ផ្សព្វផ្សាយផែនការសកម្មភាពការងារឆ្នាំ២០២៥

តំបន់អភិវឌ្ឍន៍ យោធភូមិភាគទី៥ រៀបចំកិច្ចប្រជុំបូកសរុបលទ្ធផលការងារយោធាឆ្នាំ២០២៤ និង ផ្សព្វផ្សាយផែនការសកម្មភាពការងារឆ្នាំ២០២៥

=========

(បន្ទាយមានជ័យ) ថ្ងៃទី២១ ខែមីនា ឆ្នាំ២០២៥ នៅទីបញ្ជាការតំបន់អភិវឌ្ឍន៍ យោធភូមិភាគទី៥ បានរៀបចំកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅអនុវត្តការងារឆ្នាំ២០២៥ ដែលពិធីនេះស្ថិតក្រោមអធិបតីភាព ឧត្តមសេនីយ៍ទោ យូ សុខផលលាភ មេបញ្ជាការរង យោធភូមិភាគទី៥។

អញ្ជើញមានមតិសំណេះសំណាល នាឱកាសនេះ ឧត្តមសេនីយ៍ទោ យូ សុខផលលាភ បានថ្លែងកោតសរសើរដល់ អង្គភាពតំបន់អភិវឌ្ឍន៍ ដែលបានដឹកនាំអង្គភាព មានការរីកចម្រើន និង ទទួលលទ្ធផលផ្លែផ្កាគួរជាទីមោទនៈ និង ទទួលបានការកោតសរសើរពីថ្នាក់ដឹកនាំគ្រប់ជាន់ថ្នាក់។

ឧត្តមសេនីយ៍ទោ មេបញ្ជាការរង យោធភូមិភាគទី៥ បានបន្តថា លទ្ធផលដែលអង្គភាពទទួលបានគឺពិតជាការរួមចំណែកពី នាយទាហាន នាយទាហានរង និងពលទាហានទាំងអស់ ដែលបានចូលរួមគិត ចូលរួមធ្វើ និងទទួលខុសត្រូវខ្ពស់ ដោយឈរលើផែនការការងាររបស់យោធភូមិភាគទី៥ ធ្វើឱ្យទីបញ្ជាការ ធានាបានគ្រប់ភារកិច្ចដែលថ្នាក់លើប្រគល់ជូន ដូចជាការងារហ្វឹកហ្វឺន ប្រមូលផ្តុំគ្រប់គ្រងកម្លាំង ជំរុញការងារបង្កបង្កើនផល ចិញ្ចឹមសត្វ ធានាជីវភាពកងទ័ព ហើយបានបញ្ជូនកម្លាំងចុះប្រតិបត្តិការជួយសង្រ្គោះប្រជាពលរដ្ឋ រងគ្រោះដោយធម្មជាតិ គ្រោះទឹកជំនន់ ខ្យល់កន្រ្តាក់ ជួយកសាង ជួសជុលលំនៅដ្ឋាន ពិសេសការងារការពារខ្សែបន្ទាត់ព្រំដែន កុំឱ្យបាត់បង់សូមបីមួយមីលីម៉ែត្រ។