សម្តេចតេជោ ហ៊ុន សែន មិនអាចអនុវត្តវប្បធម៌សន្ទនាជាមួយអ្នកនយោបាយក្បត់ជាតិ ដែលវាយប្រហារសម្តេច និងក្រុមគ្រួសារ

សម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានបញ្ជាក់ជាថ្មីថា សម្ដេចមិនអាចអនុវត្តវប្បធម៌សន្ទនាជាមួយក្រុមអ្នកនយោបាយក្បត់ជាតិ ដែលបានវាយប្រហារលើសម្ដេចនិងគ្រួសាររបស់សម្ដេចនោះទេ ពីព្រោះតែជនទាំងនោះនៅតែចិញ្ចឹមចិត្តកម្ចាត់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជាមិនដែលឈប់នោះឡើយដែរ ពោលគឺនៅតែប្រកាន់ខ្ជាប់នូវមនោគមវិជ្ជានិងវប្បធម៌នយោបាយជ្រុលនិយម និងហិង្សានិយម ដែលគ្មានខុសអ្វីពីមនោគមវិជ្ជាហិង្សបង្ហូរឈាមពីអតីតកាលនោះទេ។

ការបញ្ជាក់នេះធ្វើឡើងក្នុងឱកាសសម្តេចតេជោ ហ៊ុន សែន អញ្ជើញជាអធិបតីភាពក្នុងកម្មវិធីបិទសន្និសីទលើកទី១ ស្តីពីអនាគតកម្ពុជាគ្មានអំពើប្រល័យពូជសាសន៍ នាព្រឹកថ្ងៃទី២២ ខែឧសភា ឆ្នាំ២០២៤ នៅសាលយុត្តិតេជោ ឬជាអតីតសាលាជំនុំជម្រះក្ដីអតីតមេដឹកនាំខ្មែរក្រហម។

នាឱកាសនោះ​ សម្ដេចតេជោ ហ៊ុន សែន បានថ្លែងថា ការបង្កើតវប្បធម៌សន្ទនាគឺមានសង្គតិភាពជាមួយនឹងការបង្កើតលទ្ធិប្រជាធិបតេយ្យ សេរី និងពហបក្ស ដោយគោរពគោលការណ៍នីតិរដ្ឋ ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា។

សម្ដេចបានបន្តថា លទ្ធិប្រជាធិបតេយ្យ គឺជារបបគ្រប់គ្រងដែលគោរពភាពចម្រុះ និងផ្ដល់នូវមធ្យោបាយដ៏មានប្រសិទ្ធភាពក្នុងការដោះស្រាយនិងការគ្រប់គ្រងការខ្វែងគំនិតនយោបាយ ដោយការប្រើសន្លឹកឆ្នោតជាជាងការប្រើគ្រាប់កាំភ្លើង។ បច្ចុប្បន្ននេះ កម្ពុជាពិតជាមានគណបក្សនយោបាយច្រើន ប៉ុន្តែកម្ពុជាលែងមានក្រុមប្រដាប់អាវុធទៀតហើយ។ អ្វីដែលសំខាន់ផងនោះ គឺអំពើហិង្សាបានរលាយសាបសូន្យពីឆាកនយោបាយកម្ពុជា បន្ទាប់ពីការសម្រេចបានជោគជ័យនៃនយោបាយឈ្នះ-ឈ្នះ។ នេះជាតថភាពប្រវត្តិសាស្ត្រនយោបាយកម្ពុជា ដែលបង្ហាញពីភាពចាស់ទុំ និងលទ្ធិប្រជាធិបតេយ្យក្នុងប្រទេស។

សម្ដេចតេជោថ្លែងយ៉ាងដូច្នេះថា «យ៉ាងណាក្ដី ខ្ញុំពិតជាមិនអាចអនុវត្តវប្បធម៌សន្ទនាជាមួយអ្នកនយោបាយក្បត់ជាតិ ដែលបានវាយប្រហារលើរូបខ្ញុំនិងគ្រួសារខ្ញុំឥតឈប់ឈរនោះទេ ទោះបីជាខ្ញុំធ្លាប់សុខចិត្តទទួលអ្នកនយោបាយជ្រុលនិយមនេះក្នុងមនោសញ្ចេតនាជាមហាគ្រួសារខ្មែរក៏ដោយ។ ជនម្នាក់នេះនៅតែចិញ្ចឹមចិត្តកម្ចាត់រាជរដ្ឋាភិបាលដឹកនាំដោយគណបក្សប្រជាជនកម្ពុជា ពោលគឺនៅតែប្រកាន់ខ្ជាប់នូវមនោគមវិជ្ជានិងវប្បធម៌នយោបាយជ្រុលនិយម និងហិង្សានិយម ដែលគ្មានខុសអ្វីពីមនោគមវិជ្ជាហិង្សបង្ហូរឈាមពីអតីតកាលនោះទេ»។

សម្ដេចប្រធានព្រឹទ្ធសភាបានបន្តទៀតថា សន្តិភាពនៅកម្ពុជាមិនមែនជាទ្រព្យដែលធ្លាក់ពីលើមេឃនោះទេ សន្តិភាពគឺជាសមិទ្ធផលដែលគ្រប់ភាគីសម្រេចបានដោយលំបាកបំផុត ដោយឆ្លងកាត់ការតស៊ូ ការចរចាដ៏តានតឹងជាច្រើនឆ្នាំប្រកបដោយបញ្ញាញាណ ព្រមទាំងការប្ដេជ្ញាចិត្តមុះមុត ការអត់ធ្មត់ ការទប់ទល់នឹងខ្មែរគ្នាឯងផង និងការទប់ទល់តតាំងនឹងប្រទេសមហាអំណាចតូចធំផង។

សម្ដេចតេជោបានរំឭកថា ជាមួយនឹងលទ្ធផលវិជ្ជាមានជាច្រើនដែលសម្រេចបាននោះ អ៊ុនតាក់បានចាកចេញពីកម្ពុជានៅឆ្នាំ១៩៩៣ ដោយមិនបានសម្រេចបេសកកម្មរបស់ខ្លួនទាំងស្រុងនោះទេ សន្តិភាពពេញលេញដែលជាគោលដៅចម្បងបំផុតនៃកិច្ចព្រមព្រៀងសន្តិភាពទីក្រុងបារីសមិនត្រូវបានសម្រេចនោះឡើយ អ៊ុនតាក់បានចាកចេញដោយបន្សល់ទុកនូវតំបន់ត្រួតត្រា២ និងរដ្ឋាភិបាល២។ កម្ពុជាបានស្ថិតក្នុងស្ថានភាពស្បែកខ្លា ដោយមានតំបន់គ្រប់គ្រងដោយខ្មែរក្រហម ហើយជម្លោះប្រដាប់អាវុធក៏បន្តមាននៅក្នុងប្រទេស។ សម្ដេចតេជោត្រូវប្រឹងប្រែងរួមជាមួយសហការីជិតស្និទ្ធមួយចំនួន ដើម្បីសម្រេចបាននូវសន្តិភាពពេញលេញនេះ ជាមួយនឹងការសម្រេចបាននូវការបង្រួបបង្រួមជាតិ និងឯកភាពទឹកដីទាំងស្រុងនៅក្នុងឆ្នាំ១៩៩៨ តាមរយៈនយោបាយឈ្នះ-ឈ្នះ។

មកដល់ពេលនេះ កម្ពុជាមានសន្តិភាពជាង២៥ឆ្នាំហើយ សន្តិភាពនេះបានអនុញ្ញាតឱ្យកម្ពុជាបានប្រមូលធនធានគ្រប់យ៉ាង និងប្រមូលការប្រឹងប្រែងរបស់ប្រទេសជាតិទាំងមូល ដើម្បីកសាងនិងអភិវឌ្ឍប្រទេសជាតិឱ្យរីកចម្រើនដូចសព្វថ្ងៃ ដោយហេតុនេះប្រជាពលរដ្ឋទាំងអស់គ្នាត្រូវរួមគ្នាអរគុណសន្តិភាព និងការពារសន្តិភាពឱ្យបានស្ថិតស្ថិរគង់វង្ស ដោយមិនអនុញ្ញាតឱ្យមានការបំផុសបំផុល ឬចលនាជ្រុលនិយមដែលនាំមកនូវការបែកបាក់ និងការបង្កគ្រោះថ្នាក់ដល់សន្តិភាព ស្ថិរភាព និងសុខដុមក្នុងសង្គមជាតិឡើយ។ នេះជាការបន្ថែមរបស់សម្ដេចប្រធានព្រឹទ្ធសភា៕