ក្នុងជំនួបជាមួយសម្តេចធិបតី, ក្រុមហ៊ុន SunRice របស់អូស្ត្រាលី ចង់បង្កើតរោងចក្រកែច្នៃអង្ករសរីរាង្គ នៅកម្ពុជា

ក្រុមហ៊ុន SunRice Group របស់ប្រទេសអូស្ត្រាលី បានបង្ហាញបំណងបង្កើត​រោង​ចក្រ​នៅកម្ពុជា ដើម្បីកែច្នៃអង្ករ ជាពិសេសអង្ករសរីរាង្គ ដើម្បីនាំចេញទៅផ្គត់ផ្គង់លើទីផ្សារអន្តរជាតិ។

បំណងនេះត្រូវបានបញ្ជាក់ដោយលោក Paul Serra នាយកប្រតិបត្តិក្រុមហ៊ុន SunRice Group ពេលជួបសម្តែងការគួរសម និងពិភាក្សាការងារ ជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នាទីក្រុងម៉ែលប៊ន ប្រទេសអូស្ត្រាលី នៅព្រឹកថ្ងៃចន្ទ ទី៤ ខែមីនា ឆ្នាំ២០២៤នេះ។

ក្នុងជំនួបនោះ លោកនាយកប្រតិបត្តិក្រុមហ៊ុន SunRice Group បានថ្លែងអំណរគុណសម្តេចធិបតី ដែល​បានអនុញ្ញាតឱ្យរូបលោក និងសហការី ចូលជួបសម្តែងការគួរសម និងពិភាក្សាការងារ។ លោក​នាយក​ប្រតិបត្តិ បានគោរពជម្រាបសម្ដេចធិបតីថា ក្រុមហ៊ុន SunRice Group ជាក្រុមហ៊ុន​អូស្រ្តាលី ទី១ ដែលបាននាំអង្ករពីកម្ពុជាមកកាន់ប្រទេសអូស្រ្តាលី និងប្រទេសណូវែលហ្សេឡង់។

លោកនាយកប្រតិបត្តិបានកត់សម្គាល់ឃើញថា កម្ពុជាមានសក្ដានុពលលើវិស័យកសិកម្ម ដោយអង្ករ​កម្ពុជា​មានកេរ្តិ៍ឈ្មោះល្បីល្បាញលើសកលលោក ហើយកម្ពុជាក៏មានគុណសម្បត្តិប្រកួតប្រជែង​ខ្ពស់​លើ​កម្លាំងពលកម្មវ័យក្មេង ស្ថិរភាពនៃតម្លៃអគ្គិសនី ជាមួយហេរដ្ឋារចនាសម្ព័ន្ធដឹកជញ្ជូនប្រទាក់ក្រឡា និង​ឡូជីស្ទីកល្អប្រសើរផងដែរ។ ផ្អែកលើសក្ដានុពលទាំងនេះ ក្រុមហ៊ុនលោកមានបំណង​ពង្រឹង និងពង្រីក​ទំនាក់ទំនងបន្ថែមទៀតជាមួយកម្ពុជាលើវិស័យកសិកម្ម ដោយផ្តោតលើឧស្សាហកម្មកែច្នៃអង្ករ។ ក្នុងនោះ​ក្រុមហ៊ុនបង្ហាញបំណងវិនិយោគលើការបង្កើតរោងចក្រកែច្នៃអង្ករ ពិសេសអង្ករសរីរាង្គ សម្រាប់នាំចេញ​ទៅ​ក្រៅប្រទេស។

សម្តេចធិបតី ហ៊ុន ម៉ាណែត បានស្វាគមន៍បំណងរបស់ក្រុមហ៊ុន​ក្នុងការពង្រីកសកម្មភាពវិនិយោគ​របស់​ខ្លួននៅកម្ពុជាលើឧស្សាហកម្មកែច្នៃអង្ករ សម្រាប់បម្រើឱ្យការនាំចេញ។ សម្ដេចធិបតី ក៏បាន​បញ្ជាក់​ជូន​ក្រុមហ៊ុនថា វិស័យកសិកម្ម ជាវិស័យអាទិភាពមួយ ដែលរដ្ឋាភិបាលបានយកចិត្តទុកដាក់។ បច្ចុប្បន្ន​ រាជ​រដ្ឋាភិបាលបានដាក់ចេញគោលនយោបាយដាក់ពង្រាយមន្ត្រីជំនាញកសិកម្មនៅតាមមូលដ្ឋានឃុំ សង្កាត់​ទូទាំងប្រទេស ដើម្បីគាំទ្រប្រជាកសិករដល់មូលដ្ឋាន លើផ្នែកបច្ចេកទេស សំដៅបង្កើនផលិតភាព​ផលិត​ផលកសិកម្មនៅតាមមូលដ្ឋាន។

សម្ដេចធិបតីប្រមុខរាជរដ្ឋាភិបាលកម្ពុជា ក៏បានបញ្ជាក់ជូននាយកប្រតិបត្តិក្រុមហ៊ុន​អំពីការយក​ចិត្តទុក​ដាក់​របស់រាជរដ្ឋាភិបាលលើការពង្រីកហេដ្ឋារចនាសម្ព័ន្ធដឹកញ្ជូន និងប្រព័ន្ធឡូជីស្ទីក និងគោលនយោ​បាយ​អភិវឌ្ឍន៍វិស័យថាមពលអគ្គិសនីនៅកម្ពុជា។ សម្ដេចធិបតី បានសង្កត់ថា រាជរដ្ឋាភិបាល បាន​និង​កំពុងផ្ដោតអាទិភាពលើការប្រើប្រាស់ថាមពលស្អាត និងថាមពលកកើតឡើងវិញ ​ដេីម្បី​គាំទ្រ​សកម្មភាព​ធុរកិច្ច​ និង​ពាណិជ្ជកម្ម​នៅកម្ពុជាកាន់តែមានសមត្ថភាព​ប្រកួតប្រជែង​ និងផ្តល់ភាពងាយស្រួលក្នុង​ការ​តភ្ជាប់​ ក៏ដូចជាកាត់បន្ថយថ្លៃដឹកជញ្ជូន​។

សម្តេច​ធិបតី​ បាន​លេីក​ទឹកចិត្ត​ឱ្យក្រុមហ៊ុន​ទស្សនកិច្ចនៅកម្ពុជា ​ដេីម្បី​​ស្វែងរក​ឱកាស​វិនិយោគ​បន្ថែមទៀត​ដោយពិភាក្សាជាមួយ​ក្រសួង​ស្ថាប័ន​ពាក់ព័ន្ធ​របស់កម្ពុជា៕