កងពលធំអន្តរាគមន៍លេខ៣ប្រារព្ធធ្វើពិធីសិក្ខាសាលាបូកសរុបលទ្ធផលការងារយោធាសន្តិសុខឆ្នាំ២០២៣ និង ដាក់ចេញទិសដៅការងារបន្ត២០២៤

កងពលធំអន្តរាគមន៍លេខ៣ប្រារព្ធធ្វើពិធីសិក្ខាសាលាបូកសរុបលទ្ធផលការងារយោធាសន្តិសុខឆ្នាំ២០២៣ និង ដាក់ចេញទិសដៅការងារបន្ត២០២៤

ខេត្តព្រះវិហារ៖ នៅព្រឹកថ្ងៃព្រហស្បតិ៍ ៥រោច ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៩ ខែកុម្ភៈ ឆ្នាំ២០២៤នេះ នៅទីបញ្ជាការកងពលធំអន្តរាគមន៍លេខ៣ បានប្រារព្ធពិធីសិក្ខាសាលាបូកសរុបលទ្ធផលការងារយោធាសន្តិសុខឆ្នាំ២០២៣ និង ដាក់ចេញទិសដៅការងារបន្តឆ្នាំ២០២៤ របស់កងពលធំអន្តរាគមន៍លេខ៣ ក្រោមអធិបតីភាព ឯកឧត្តម ឧត្តមសេនីយ៍ឯក ស្រី ឌឹក មេបញ្ជាការរងកងទ័ពជើងគោក មេបញ្ជាការកងពលធំអន្តរាគមន៍លេខ៣ តំណាងដ៍ខ្ពង់ខ្ពស់ ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក។

នៅក្នុងឱកាស នៃអង្គសិក្ខាសាលានេះដែរ ឯកឧត្តម ឧត្តមសេនីយ៍ឯក ស្រី ឌឹក បានធ្វើការវាយតម្លៃខ្ពស់ចំពោះការខិតខំប្រឹងប្រែងអស់កម្លាំងកាយចិត្តរបស់ នាយ-ពលទាហាន និងថ្នាក់ដឹកនាំ បណ្តាអង្គភាពចំណុះ កងពលធំអន្តរាគមន៍លេខ៣ ទាំងអស់ ដែលនៅក្នុងឆ្នាំ២០២៣កន្លងមកនេះ បានបំពេញការងារតាម តួនាទីភារកិច្ច និងតាមជំនាញនីមួយៗរបស់ខ្លួនបានល្អប្រសើរ ប្រកបដោយការទទួលខុសត្រូវខ្ពស់ ទាំងកម្លាំងដែលកំពុងឈរជើងការពារបូរណភាពទឹកដី នៅតាមបណ្តោយបន្ទាត់ព្រំដែន ខ្សែត្រៀមជួរមុខ ក្នុងវិស័យប្រៀប ការពារជាតិរឹងមាំយូរអង្វែង ក៍ដូចជាកម្លាំងអន្តរាគមន៍ ឈរជើងនៅតាមអង្គភាពខាងក្រោយ។

ទន្ទឹមនឹងនោះផងដែរ ឯកឧត្តម ក៍បានណែនាំចង្អុលបង្ហាញអោយបងប្អូនបន្តអនុវត្តការងារលើគ្រប់ វិស័យនៅតាមអង្គភាពនីមួយៗ អោយកាន់តែល្អប្រសើរឡើងថែមទៀតសម្រាប់ឆ្នាំ២០២៤នេះ ពិសេស បងប្អូនដែលកំពុងឈរជើងតាមខ្សែត្រៀមជួរមុខ សូមបន្តអនុវត្តយុទ្ធសាស្រ្ត៣ សកម្មភាព១០ របស់ សម្តេចតេជោ ដែលបានដាក់ចេញនាពេលកន្លងមក ក្នុងនោះ យុទ្ធសាស្រ្តដែលសំខាន់បំផុតទាក់ទងនឹងបញ្ហាព្រំដែននោះគឺ៖ “កសាងខ្សែបន្ទាត់ព្រំដែន ជាមួយប្រទេសជិតខាង ឱ្យទៅជា ខ្សែព្រំដែន សន្តិភាព មិត្តភាព សហប្រតិបត្តិការ និងមានការអភិវឌ្ឍន៍៕