តំបន់ប្រតិបត្តិការសឹករងកំពង់ធំ បិទវគ្គផ្សព្វផ្សាយការងារចុះបញ្ជីគ្រប់គ្រងគ្រឿងបំពាក់សម្ភារៈបច្ចេកទេស តាមប្រព័ន្ធបច្ចេកវិទ្យា
- ការពារជាតិ
- February 21, 2024
តំបន់ប្រតិបត្តិការសឹករងកំពង់ធំ បិទវគ្គផ្សព្វផ្សាយការងារចុះបញ្ជីគ្រប់គ្រងគ្រឿងបំពាក់សម្ភារៈបច្ចេកទេស តាមប្រព័ន្ធបច្ចេកវិទ្យា ។
ខេត្តកំពង់ធំ៖ នៅរសៀលថ្ងៃទី២០ ខែកុម្ភៈ ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ បានដំណើរការបិទវគ្គផ្សព្វផ្សាយការងារចុះបញ្ជីគ្រប់គ្រងគ្រឿងបំពាក់សម្ភារៈបច្ចេកទេស តាមប្រព័ន្ធបច្ចេកវិទ្យា ដែលពិធីនេះប្រព្រឹត្តទៅស្ថិតក្រោមអធិបតីភាពឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ ។
លោកវរសេនីយ៍ឯក ឈុំ ឆៃ មេបញ្ជាការរងទទួលបន្ទុកការងារបច្ចេកទេសនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានឡើងរាយការណ៍អំពីលទ្ធផលនៃការផ្សព្វផ្សាយការងារចុះបញ្ជីគ្រប់គ្រងគ្រឿងបំពាក់សម្ភារៈបច្ចេកទេស ដែលបានផ្សព្វផ្សាយ និងអប់រំរៀនសូត្រ ជូនដល់សិក្ខាកាម ដែលជានាយទាហាន នាយទាហានរង គ្រប់គ្រងការងារបច្ចេកទេស ដែលបានអញ្ជើញមកពីគ្រប់តាមបណ្ដាកងឯកភាពចំណុះនៃបញ្ជាការដ្ឋានតំបន់ប្រតិបត្តិការសឹករងកំពង់ធំ អស់រយៈពេលពេញមួយព្រឹកកន្លងទៅ ប្រកបដោយស្មារតីទទួលខុសត្រូវខ្ពស់ ។
ឧត្តមសេនីយ៍ទោ សោម ស៊ុន បានណែនាំដល់ថ្នាកដឹកនាំ និងនាយទាហានទទួលបន្ទុកការងារបច្ចេកទេសនៅគ្រប់បណ្ដាកងឯកភាព ត្រូវយកចិត្តទុកដាក់៖ ទី១ ត្រូវគ្រប់គ្រងឲ្យបានហ្មត់ចត់នៅសម្ភារៈបច្ចេកទេសគ្រឿងយុទ្ធោបករណ៍ ដែលថ្នាក់លើបានបំពាក់នៅតាមអង្គភាពនីមួយៗ មិនឲ្យមានការបាត់បង់ឬខូចខាត។ ទី២ មិនអនុញ្ញាតឲ្យយោធិនណាម្នាក់យកអាវុធ គ្រាប់ចេញក្រៅអង្គភាពដោយគ្មានលិខិតបញ្ជាបេសកកម្មពីមេបញ្ជាការតំបន់ប្រតិបត្តិការសឹករង ជាដាច់ខាត ។ ទី៣ ត្រូវធ្វើការផ្ទៀងផ្ទាត់ការចុះបញ្ជីគ្រឿងសម្ភារៈបច្ចេកទេសដោយដៃ និងតាមប្រព័ន្ធបច្ចេកវិទ្យា ឲ្យបានត្រឹមត្រូវច្បាស់លាស់ ដើម្បីធានាការគ្រប់គ្រងឲ្យបានហ្មត់ចត់ ។ ទី៤ ត្រូវគ្រប់គ្រងថែរក្សា ដុសលាង និងជួសជុល គ្រឿងយុទ្ធោបករណ៍ ដែលថ្នាក់លើបានបំពាក់ជូន ធានាបានក្នុងការបំពាក់ជូនយោធិនក្នុងភារកិច្ចការពារបូរណភាពទឹកដី និងការពារជាតិមាតុភូមិ និងទី៥ នាយទាហានទទួលបន្ទុកការងារបច្ចេកទេស ត្រូវរក្សាការសម្ងាត់ការងារយោធាឲ្យបានជាដាច់ខាត បើក្នុងករណីមានយោធិនណាម្នាក់ប្រព្រឹត្តខុសឆ្គង ផ្ទុយពីលក្ខន្តិកៈនិងបទពិន័យទូទៅរបស់កងយោធពលខេមរភូមិន្ទ ត្រូវទទួលទោសតាមច្បាប់ជាធរមាន។
ថ្នាក់ដឹកនាំ និងនាយទាហាន នាយទាហានរង ទទួលបន្ទុកការងារបច្ចេកទេសទាំងអស់ដែលបានចូលរួមវគ្គផ្សព្វផ្សាយការចុះបញ្ជីគ្រប់គ្រងគ្រឿងបំពាក់សម្ភារៈបច្ចេកទេសតាមប្រព័ន្ធបច្ចេកវិទ្យានៅពេលនេះ បានប្តេជ្ញាចិត្តដាច់ខាតអនុវត្តន៍ឲ្យបានម៉ឺងម៉ាត់តាមការណែនាំរបស់ស្ថាប័នជំនាញ និងមេបញ្ជាការតំបន់ប្រតិបត្តិការសឹករងកំពង់ធំ ឲ្យទទួលលទ្ធផលល្អ និងជោគជ័យ ។
credit : កងទ័ពជើងគោកនៃកងយោធពលខេមរភូមិន្ទ
