សក្តានុពល​ស្វាយចន្ទីកម្ពុជា ក្រោមកិច្ចសម្របសម្រួលរបស់ រាជរដ្ឋាភិបាល​កម្ពុជា​

ការលើកទឹកចិត្ត និងផ្តល់កិច្ចសម្រួលដល់ការវិនិយោគបរទេស និងក្នុងស្រុកនឹងចូលរួមចំណែកទាក់ទាញសកម្មភាពវិនិយោគដែលមានសែស្រឡាយពាក់ព័ន្ធនឹងស្វាយចន្ទីឱ្យកាន់តែរីកធំធាត់ និងមានភាពរឹងមាំ ។​
កាលពីល្ងាចថ្ងៃទី១ ខែកុម្ភៈ ឆ្នាំ២០២៤​នាខេត្តសៀមរាប ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) បានអញ្ជើញចូលរួមជាវាគ្មិនកិត្តិយសក្នុងវេទិកាស្តីពីស្វាយចន្ទីកម្ពុជាដែលជាព្រឹត្តិការណ៍អមនៃសន្និសីទស្វាយចន្ទីពិភពលោកលើកទី ១០ ឆ្នាំ២០២៤ ក្នុងគោលបំណងផ្សព្វផ្សាយអំពីកាលានុវត្តភាពវិនិយោគនៅកម្ពុជា។

មានមតិក្នុងវេទិកាពិភាក្សា ឯកឧត្តមបានគូសបញ្ជាក់អំពីបេសកកម្មរបស់ក្រុមប្រឹក្សាអភិវឌ្ឍន៍កម្ពុជាក្នុងការលើកទឹកចិត្ត និងផ្តល់កិច្ចសម្រួលដល់ការវិនិយោគបរទេស និងក្នុងស្រុក ដែលនឹងចូលរួមចំណែកទាក់ទាញសកម្មភាពវិនិយោគដែលមានសាយស្រឡាយពាក់ព័ន្ធនឹងស្វាយចន្ទីឱ្យកាន់តែរីកធំធាត់ និងមានភាពរឹងមាំ។ ជាមួយគ្នានេះ ឯកឧត្តមបានបរិយាយអំពីឧត្តមភាពប្រៀបធៀប និងសក្តានុពលក្នុងការជ្រើសយកកម្ពុជាជាទីតាំងវិនិយោគលើខ្សែច្រវាក់ផលិតកម្ម និងកែច្នៃស្វាយចន្ទី។ លើសពីនេះ ឯកឧត្តមក៏បានពិពណ៌នាលម្អិតអំពីកញ្ចប់លើកទឹកចិត្តលើគម្រោងវិនិយោគមានលក្ខណសម្បត្តិគ្រប់គ្រាន់ពាក់ព័ន្ធនឹងការផលិត និងកែច្នៃស្វាយចន្ទីផងដែរ។

ជាកិច្ចបញ្ចប់ ឯកឧត្តមបានជំរុញ និងលើកទឹកចិត្តឱ្យវិនិយោគិន និងធុរជនដែលមានវត្តមាននាឱកាសនេះឱ្យច្បាមយកកាលានុវត្តភាពជាអតិបរមាពីកត្តាសុខសន្តិភាព, ស្ថិរភាពសេដ្ឋកិច្ច និងនយោបាយ, បរិយាកាសវិនិយោគប្រកបដោយភាពទាក់ទាញ, បរិស្ថានធុរកិច្ចដែលអំណោយផល, និងភាពរីកលូតលាស់នៃហេដ្ឋារចនាសម្ព័ន្ធតភ្ជាប់ មកបណ្តាក់ទុនធ្វើប្រតិបត្តិការអាជីវកម្មឱ្យកាន់តែច្រើនឡើងបន្ថែមទៀតនៅកម្ពុជា ជាពិសេសក្នុងវិស័យកសិ-ចំណីអាហារដែលជាវិស័យមានសក្តានុពលខ្ពស់ និងទីផ្សារប្រកបដោយថាមវន្ត ៕