កម្មពិធី ជីវិតនិងការងារ ៖ លោក ឆុន វាសនា ពីវិស្វករសំណង់ស៊ីវិល មកជាអ្នកជំនួញ អចលនទ្រព្យ
- ការងារ និងមុខរបរព័ត៌មានផ្សេងៗសេដ្ឋកិច្ច/ពាណិជ្ជកម្ម
- June 15, 2025
កម្មពិធីជីវិតនិងការងារ របស់ ហនុមានញូស៍ ថ្ងៃនេះសូមលេីកយកជីវិតតស៊ូរបស់យុវជនដេីមកំណេីតខេត្តព្រៃវែងម្នាក់ ដេីម្បីមកជម្រាបជូនប្រិយមិត្តទាំងអស់បានអាន និងស្វែងយល់ពីការតស៊ូរបស់មនុស្សម្នាក់ៗលេីលោកយេីងនេះ ចាត់ទុកជាការយល់និងបទពិសោធន៍ ។
លោក ឆុន វាសនា អាយុ ៣៨ឆ្នាំ កេីតនៅភូមិពោធិស្នាយ ឃុំព្រៃឃ្នេស ស្រុកមេសាង ខេត្តព្រៃវែង ។ លោកមានបងប្អូនបង្កេីតចំនួន៥នាក់ ប្រុស ២នាក់ ស្រី ៣នាក់ លោកជាកូនទី ៤ ក្នុងគ្រួសារ ។
ដោយស្ថិតក្នុងគ្រួសារជាអ្នកធ្វេីស្រែចំការ ធ្វេីឲ្យការសិក្សារបស់លោកមានកម្រិតទៅតាមលទ្ឋភាពគ្រួសារ ទាំងពេលវេលា ទាំងថវិការ ។ ព្រោះថាពេលវាលាមួយភាគធំ របស់លោកត្រូវចែករំលែកជួយក្រុមគ្រួសារសឹងតែជាងការសិក្សា ។ ដោយសារតែស្គាល់ពីភាពលំបាកវេទនាក្នុងនាមជាអ្នកស្រែចំការ និងចង់ប្រែក្លាយជីវិតនិងជីវភាព ទេីបនៅឆ្នាំ ២០០៩ ពេលដែលបញ្ចប់ការសិក្សានៅមធ្យមសិក្សាទុតិយភូមិ ( Bac II ) នាវិទ្យាល័យ មេសាង នៅស្រុកកំណេីត លោកក៏បានសម្រេចចិត្តមកបន្តការសិក្សានៅរាជធានីភ្នំពេញ ។
ការមករស់នៅក្នុងរាជធានីភ្នំពេញឆ្ងាយស្រុកកំណេីត ទាំងដែលខ្លួនមានជីវភាពមិនធូធារដូចគេផងនោះ ធ្វេីឲ្យលោកមានការលំបាកខ្លាំង មិនដូចជាកូនគេដែលមានជីវភាពល្អប្រសើរនោះទេ ។ មុនដំបូងឡេីយ លោកត្រូវទៅរកផ្ទះជួលនៅមួយរយៈ តែពេលក្រោយមកដោយមានទំនាក់ទំនងជាមួយមិត្តភ័ក្ដិដែលធ្លាប់រៀនជាមួយគ្នានៅស្រុកកំណេីត លោកក៏បានដូរមករស់នៅឯវត្តអារាមវិញម្តង គឺនៅវត្តនាគវ័ន្ត ។ ហេីយក្នុងពេលនោះដែរ លោកក៏បានចូលរៀននៅឯ វិទ្យាស្ថានពហុបច្ចេកទេស ព្រះកុសុមៈ លេីជំនាញសំណង់ស៊ីវិល ( Civil Engineering ) ។
ជីវិតរស់នៅក្នុងរាជធានីភ្នំពេញ មិនខុសពីស្រុកកំណើតប៉ុន្មានទេ មិនខុសគ្នាត្រង់ថាជីវភាពហ្នឹងតែម្តង ។ លោក ឆុន វាសនា ទទួលរងនូវការប្រមាថមេីលងាយផ្សេងៗ ពីមនុស្សជុំវិញខ្លួនដែលមានជីវភាពគ្រាន់បេីជាង ។ ដោយមិនចុះញ៉មនូវការប្រមាថ និងដោយក្តីសង្ឃឹមនៅក្នុងចិត្តថា ថ្ងៃណាមួយនឹងមានជីវិតល្អដូចគេដូចឯង លោកខិតខំប្រឹងប្រែងរៀនសូត្រ ហេីយក្រៅពីការរៀនសូត្រ ឆ្លៀតពេលទំនេរ លោករត់ម៉ូតូឌុបផង ហេីយជួន្លះទៀតក៏ធ្វេីកម្មករសំណង់ផងដែរគឺនៅ ក្រុមហ៊ុន បូរីពិភពថ្មី របស់ អ្នកឧកញ៉ា ហុង ពីវ ។
ពេលវេលាចេះតែរំកិលទៅមុខឥតឈប់ឈរ ធ្មេចបើកៗ លេីកបានបញ្ចប់ការសិក្សាដោយទទួលនូវ សញ្ញាបត្របរិញ្ញាបត្រ ផ្នែកសំណង់ស៊ីវិល នៅឆ្នាំ ២០១៤ ។ ពេលនោះហេីយដែលធ្វេីឲ្យជីវភាពរបស់លោកមានភាពល្អប្រសេីរជាងមុន ដោយទទួលប្រាក់ខ្ពស់ទៅតាមចំណេះចំនាញផ្ទាល់ខ្លួន ។
យុវជន ឆុន វាសនា មិនខុសពីយុវជនផ្សេងៗទៀតនោះទេ វ័យគ្រប់ការក៏ចូលមកដល់ ។ ពាក្យចាស់លោកពោលថា ជួញជិតជាជាងជួញឆ្ងាយ លោកក៏បានចាប់ចិត្តប្រតិព័ទ្ធលេី យុវតីម្នាក់ដែលជានិស្សិតពេទ្យឆ្មប ដែលមានស្រុកកំណើតក្បែរគ្នា គឺយុវតីមកពីខេត្តស្វាយរៀង ។ ដោយចង់កសាងជីវិត ឪពុកម្តាយទាំងសងខាងក៏បានរេីសពេលាមង្គល អាពាហ៍ពិពាហ៍ ផ្សំផ្គុំយុវជនសំណង់ស៊ីវិលព្រៃវែងជាមួយ យុវតីពេទ្យឆ្មបស្វាយរៀងនៅថ្ងៃទី ២៧ ខែវិច្ឆិកា ឆ្នាំ២០១៤ ។ ចំណងស្នេហ៍ យុវជនយុវតីទាំងពីរឈានទៅដល់ម្តាយទុកឪពុកដាក់ រហូតមកដល់ពេលនេះជាងដប់ឆ្នាំ បានបន្សល់នូវ បុត្រាចំនួនបីនាក់ ។ ឆ្លេីយតបជាមួយសំនួរដែល ហនុមានញូស៍ សួរថា តេីត្រូវតាមរកកូនស្រីមួយទៀតដែរទេ?
លោកក៏ផ្ទុះសំណេីចហេីយឆ្លេីយទាំងញញឹមញញែមថា ៖ មិនទាន់គិតទេបង ព្រោះថាសម័យនេះត្រូវចំណាយច្រេីនណាស់…។
ក្នុងអាជីពជា វិស្វករសំណង់ស៊ីវិល ជាង ១៥ឆ្នាំ នៅក្រុមហ៊ុន បូរីពិភពថ្មី របស់ អ្នកឧកញ៉ា ហុង ពីវ ត្រូវបានបញ្ចប់ បច្ចុប្បន្ននេះ លោកបង្កេីតការងារដោយខ្លួនឯង ដោយវិស្វករសំណង់ស៊ីវិលរូបនេះ មានក្រុមការងារទទួលវាស់វែងដីធ្លី (តូប៉ូ) និងមានទទួលធ្វេីសេវាកម្ម លក់ដីទីញដី និយាយជារួមគឺ សេវាកម្ម ទិញ លក់ និងជួល អចលនទ្រព្យ ដែលមានឈ្មោះថា វាសនា អចលនទ្រព្យ Veasna real estate ។
លោក លោកស្រី អ្នកនាងកញ្ញា និងប្រិយមិត្តទាំងអស់អាចទំនាក់ទំនងមកលោកតាមរយៈលេខទូរស័ព្ទ ៖ 089 393 215 /093 275 736 ។
ដោយឃេីញពីការតស៊ូខិតខំ មិនរួញរាខ្លាចការលំបាក ក្នុងនាម ហនុមានញូស៍ ព្រមទាំងសហការីទាំងអស់ សូមជូនពរ លោក ឆុន វាសនា ឲ្យជួបប្រទះតែសេចក្តីសុខ សេចក្ដីចំរើន សុខភាពល្អបរិបូរណ៍ រកស៊ីទទួលទានមានបាន និងសុខសុភមង្គលក្នុងក្រុមគ្រួសារ ៕
