សម្តេចតេជោ ហ៊ុន សែន៖ ភាពរឹងមាំនៃទំនាក់ទំនងកងទ័ពកម្ពុជា-វៀតណាម ជួយជំរុញទំនាក់ទំនងរវាងប្រទេស និងប្រទេស

(ភ្នំពេញ)៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានលើកឡើងថាភាពរឹងមាំនៃទំនាក់ទំនងរវាងកងទ័ពកម្ពុជា និងវៀតណាម ជាចំណែកជួយជំរុញដល់ទំនាក់ទំនង ក៏ដូចជាវិស័យដទៃទៀតរវាងកម្ពុជា និងវៀតណាមផងដែរ។

សម្តេចតេជោ បានគូសរំលេចបែបនេះ ក្នុងជំនួបជាមួយនាយឧត្ដមសេនីយ៍ ង្វៀន តិន គឿង អនុរដ្ឋមន្ត្រីក្រសួងការពារប្រទេសវៀតណាម អគ្គសេនាធិការកងទ័ពប្រជាជនវៀតណាម នៅវិមាន៧មករា នាព្រឹកថ្ងៃពុធ ទី៤ ខែមិថុនា ឆ្នាំ២០២៥នេះ។

ជាកិច្ចចាប់ផ្តើមនៃជំនួបនោះ សម្តេចតេជោ ហ៊ុន សែន បានសម្តែងស្វាគមន៍ប្រកបដោយក្តីរីករាយចំពោះដំណើរទស្សនកិច្ចរបស់ នាយឧត្ដមសេនីយ៍ ង្វៀន តិន គឿង និងគណៈប្រតិភូនៅកម្ពុជា ។ សម្តេចតេជោ បានបង្ហាញការពេញចិត្តចំពោះទំនាក់ទំនងកម្ពុជា និងវៀតណាម ដែលបន្តកាន់តែរឹងមាំ និងស្អិតល្មួតផ្អែកលើស្មារតីជាប្រពៃណី សាមគ្គីភាព ភាពជាអ្នកជិតខាងល្អ និងកិច្ចសហប្រតិបត្តិការឈ្នះ-ឈ្នះ លើគ្រប់វិស័យ។

សម្តេចតេជោ ហ៊ុន សែន បានបង្ហាញការជឿជាក់ថា ដំណើរទស្សនកិច្ចរបស់នាយឧត្ដមសេនីយ៍ ង្វៀន តិន គឿង នឹងរួមចំណែកពង្រឹងទំនាក់ទំនងទ្វេភាគីបន្ថែមទៀត ជាពិសេសក្នុងវិស័យកងទ័ពរវាងប្រទេសទាំងពីរ។

នាយឧត្ដមសេនីយ៍ ង្វៀន តិន គឿង បានថ្លែងអំណរគុណសម្តេចតេជោ ដែលបានអនុញ្ញាតឱ្យរូបលោក និងគណៈប្រតិភូ បានជួបសម្តែងការគួរសម។ នាយឧត្ដមសេនីយ៍ ង្វៀន តិន គឿង ក៏បាននាំមកនូវការសាកសួរសុខទុក្ខពីសំណាក់លោក តូ ឡឹម អគ្គលេខាធិការបក្សកុម្មុយនិស្តវៀតណាម និងប្រធានរដ្ឋសភាវៀតណាម ជូនសម្តេចតេជោ ហ៊ុន សែន ផងដែរ។

នាយឧត្ដមសេនីយ៍ ង្វៀន តិន គឿង បានថ្លែងអំណរគុណសម្តេចតេជោ ហ៊ុន សែន ដែលបានដឹកនាំគណៈប្រតិភូចូលរួមខួប៥០ឆ្នាំនៃការរំដោះភាគខាងត្បូងរបស់វៀតណាម កាលពីខែមេសាកន្លងទៅ។

នាយឧត្ដមសេនីយ៍ ង្វៀន តិន គឿង បានថ្លែងកោតសរសើរពីការរីកចម្រើន និងការអភិវឌ្ឍយ៉ាងឆាបរហ័សនៅកម្ពុជា ជាពិសេសការថែរក្សាបាននូវសុខសន្តិភាព និងស្ថេរភាពនៅក្នុងប្រទេស ព្រមទាំងភាពរីកចម្រើនផ្នែកសេដ្ឋកិច្ចនៅកម្ពុជា។

នាយឧត្ដមសេនីយ៍ ង្វៀន តិន គឿង ក៏បាននាំនូវការអញ្ជើញរបស់លោក តូ ឡឹម ជូនសម្តេចតេជោ ហ៊ុន សែន ចូលរួមបុណ្យឯករាជ្យជាតិវៀតណាមលើកទី៨០ នាពេលខាងមុខ។

ជាការឆ្លើយតបសម្តេចតេជោ ហ៊ុន សែន បានផ្តាំផ្ញើសួរសុខទុក្ខលោក តូ ឡឹម និងផ្តាំសួរសុខទុក្ខប្រធានរដ្ឋសភាវៀតណាមផងដែរ។ សម្តេចតេជោ ហ៊ុន សែន បានអរគុណវៀតណាម សម្រាប់ការទទួលស្វាគមន៍សម្តេច និងគណៈប្រតិភូយ៉ាងកក់ក្តៅក្នុងឱកាសអញ្ជើញចូលរួមពិធីអបអរសាទរខួប៥០ឆ្នាំនៃការរំដោះភាគខាងត្បូង។

សម្តេចតេជោ ហ៊ុន សែន បានគូសរំលេចថា នៅថ្ងៃទី២០ ខែមិថុនា ឆ្នាំ២០២៥ខាងមុខ ជាខួប៤៧ឆ្នាំ នៃដំណើរឆ្ពោះទៅរកការរំដោះជាតិកម្ពុជា ចេញពីរបបប្រល័យពូជសាសន៍ ប៉ុល ពត ជាដំណើររំដោះជាតិដែលសម្តេចបានយកជីវិតធ្វើជាដើមទុន។

សម្តេចតេជោ បានបញ្ជាក់ថា ខួប៤៧ឆ្នាំ នៃដំណើរឆ្ពោះទៅរកការរំដោះជាតិនេះ ឧបនាយករដ្ឋមន្ត្រី ទៀ សីហា រដ្ឋមន្ត្រីការពារជាតិ នឹងអញ្ជើញជាអធិបតីក្នុងពិធីនេះ។ ដោយឡែកខួប៥០ឆ្នាំនា៣ឆ្នាំខាងមុខនេះ គឺសម្តេចតេជោ នឹងអញ្ជើញជាអធិបតីដោយផ្ទាល់តែម្តង ដើម្បីរំលឹកនូវប្រវត្តិសាស្ត្រនៃការតស៊ូក្នុងការរំដោះជាតិ និងជីវិតប្រជាពលរដ្ឋកម្ពុជា។

ក្នុងជំនួបនេះសម្តេចតេជោ ហ៊ុន សែន ក៏បានលើកឡើផងដែរអំពីកិច្ចសហប្រតិបត្តិការលើវិស័យកងទ័ពរវាងកម្ពុជា និងវៀតណាម។ សម្តេចតេជោ បានបញ្ជាក់ថា កិច្ចសហប្រតិបត្តិការរវាងកងទ័ពកម្ពុជា និងវៀតណាម មានស្អិតល្មួត ហើយក៏ជាផ្នែកមួយក្នុងការជំរុញបន្ថែមទៀត ដល់ទំនាក់ទំនង និងវិនិយោគរវាងកម្ពុជា និងវៀតណាម ឱ្យកាន់តែរឹងមាំថែមទៀត ផ្តើមចេញពីទំនាក់ទំនងដ៏រឹងមាំលើវិស័យកងទ័ពនេះ។

សម្តេចតេជោ ហ៊ុន សែន ក៏បានប្រកាសទទួលយកការអញ្ជើញរបស់លោក តូ ឡឹម ទៅចូលរួមអបអរសាទរខួប៨០ឆ្នាំ នៃការទទួលបានឯករាជ្យរបស់វៀតណាមផងដែរ។

ក្នុងជំនួបនេះ សម្តេចតេជោ ក៏បានស្នើវៀតណាម ពន្លឿនការជជែកឈានទៅបញ្ចប់ការបោះបង្គោលព្រំដែនរវាងកម្ពុជា-វៀតណាម ដែលនៅសេសសល់ចំនួន ១៦ភាគរយ៕