សិក្ខាកាមវគ្គបំប៉នជំនាញបើកបររថយន្តធុនធ្ងន់ជំនាន់ទី៧ របស់កងពលតូចដឹកជញ្ជូនលេខ ៩០ កងទ័ពជើងគោកកំពុងហ្វឹកហ្វឺនមុខវិជ្ជាច្បាប់ចរាចរណ៍ផ្លូវគោក

ខេត្តកំពង់ស្ពឺ៖ កងពលតូចដឹកជញ្ជូនលេខ៩០ អនុវត្តផែនការហ្វឹកហ្វឺនរបស់បញ្ជាការដ្ឋានកងទ័ពជើងគោកឆ្នាំ២០២៥ ដើម្បីបង្កើននូវចំណេះដឹងក្នុងកងកម្លាំងនៃកងយោធពលខេមរភូមិន្ទនៅកងពលតូចដឹកជញ្ជូនលេខ៩០ ដឹកនាំបញ្ជាផ្ទាល់ដោយ ឯកឧត្តម ឧត្តមសេនីយ៍ទោ ឈរ សុខ នាយសេនាធិការរងកងទ័ពជើងគោក មេបញ្ជាការកងពល បានបើកវគ្គហ្វឹកហ្វឺនបំប៉នជំនាញបើកបររថយន្តធុនធ្ងន់ជំនាន់ទី៧ ដោយមានកាលវិភាគត្រឹមត្រូវ ជាក់ស្ដែងនៅថ្ងៃទី៣០ ខែឧសភា ឆ្នាំ២០២៥ លោកអនុសេនីយ៍ឯក ជុត សែន គ្រូបង្គោលមុខវិជ្ជាច្បាប់ចរាចរណ៍ផ្លូវគោកបានឡើងថ្នាក់ដល់សិក្ខាកាមឲ្យយល់កាន់តែច្បាស់អំពីច្បាប់ចរាចរណ៍ផ្លូវគោកនៅកម្ពុជា។

នៅពេលឡើងថ្នាក់លោកអនុសេនីយ៍ឯក ជុត សែន ជាគ្រូបង្គោលបានបញ្ជាក់យ៉ាងច្បាស់ថា÷កងកម្លាំងបើកបរទាំងអស់ត្រូវតែចេះចាំនូវច្បាប់ចរាចរណ៍ផ្លូវគោកនៅកម្ពុជា ដើម្បីធានាសុវត្ថិភាពក្នុងពេលកំពុងបើកបរបម្រើឱ្យការងារដឹកជញ្ជូននៅពេលមានបទបញ្ជារបស់អង្គភាព។

សិក្ខាកាមទាំងអស់ដែលកំពុងរៀនសូត្រនៅក្នុងថ្នាក់បានយកចិត្តទុកដាក់ស្ដាប់នូវការពន្យល់របស់លោកគ្រូ ដើម្បីទៀមទារយកចំណេះដឹងពីសាលាទៅប្រែក្លាយជាចំណេះធ្វើ ជូនអង្គភាពនៅពេលបញ្ចប់វគ្គ ៕