រដ្ឋមន្ត្រី​ក្រសួង​ពាណិជ្ជកម្ម​ ចូល​រួម​វេទិកា​សកលស្តីពី​សន្ឋានកម្មអន្តរជាតិនៅទីក្រុងហុងកុង

(ហុងកុង)៖ នារសៀលថ្ងៃសុក្រ ទី៣០ ខែឧសភា ឆ្នាំ២០២៥ នៅតំបន់រដ្ឋបាលពិសេសហុងកុង នៃសាធារណរដ្ឋប្រជាមានិតចិន លោកជំទាវ ចម និម្មល រដ្ឋមន្តីក្រសួងពាណិជ្ជកម្ម បានអញ្ជើញចូលរួមវេទិកាសកលស្តីពីសន្ធានកម្មអន្តរជាតិ។ វេទិកានេះត្រូវបានរៀបចំឡើងក្នុងគោលបំណងក្នុងការ​បង្កើតឱកាស​ដើម្បី​ឱ្យមានការ​ជជែកពិភាក្សា និងចែករំលែកបទពិសោធន៍ពីអ្នកជំនាញអន្តរជាតិ ពាក់ព័ន្ធនឹងការដោះស្រាយវិវាទក្រៅប្រព័ន្ធតុលាការ ពិសេសតាមរយៈយន្តការសន្ធានកម្ម។

នៅក្នុងវេទិកានោះផងដែរ លោកជំទាវរដ្ឋមន្ត្រី បានចូលរួមចុះហត្ថលេខាលើអនុស្សរណៈនៃ​កិច្ចសហប្រតិបត្តិការរវាងក្រសួងពាណិជ្ជកម្ម នៃព្រះរាជាណាចក្រកម្ពុជា ជាមួយនាយកដ្ឋានយុត្តិធម៌ នៃតំបន់រដ្ឋបាលពិសេសហុងកុង នៃសាធារណរដ្ឋប្រជាមានិតចិន។ អនុស្សរណៈ​នៃ​កិច្ច​សហប្រតិបត្តិការ​នេះ មាន​គោលបំណងពង្រឹងទំនាក់ទំនង ការសហការ និងកិច្ចសហប្រតិបត្តិការ រវាងគូភាគីលើកិច្ចការពាក់ព័ន្ធនឹងការបញ្ចៀស និងការដោះស្រាយវិវាទ ព្រមទាំងសម្របសម្រួលការអភិវឌ្ឍសេវាកម្មពាក់ព័ន្ធ នៅក្នុងយុត្តាធិការរៀងៗខ្លួន​៕