សម្តេចធិបតី និងលោកជំទាវ ឧបត្ថម្ភដល់គ្រួសារប្រជាពលរដ្ឋ ដែលរងគ្រោះដោយភ្លើងឆេះផ្ទះ និង ខ្យល់កន្រ្តាក់បក់

(ខេត្តកំពង់ឆ្នាំង):នៅព្រឹកថ្ងៃអង្គារ ទី២៩ ខែមេសា ឆ្នាំ២០២៥ ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត បានដឹកនាំក្រុមការងារមនុស្សធម៌ និងក្រុមការងារយោធិននារីរបស់អង្គភាព សហការជាមួយអាជ្ញាធរមូលដ្ឋាន នាំយក ស័ង្កសី ៣០សន្លឹក អង្ករ គ្រឿងឧបភោគបរិភោគ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ឧបត្ថម្ភដល់ប្រជាពលរដ្ឋ ឈ្មោះ ឆឹង ដារ៉ា អាយុ ៥៩ឆ្នាំ ជាកសិករ រស់នៅម្នាក់ឯង នៅភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ដែលត្រូវអគ្គីភ័យឆាបឆេះផ្ទះ ទំហំ ៤ x ៥ម៉ែត្រ អស់ទាំងស្រុង កាលពីល្ងាចថ្ងៃទី២៨ ខែមេសា ម្សិលមិញនេះ ដោយសារឆ្លងចរន្តអគ្គីសនី ។

បន្ទាប់មក ឯកឧត្តម ឧត្តមសេនីយ៍ត្រី អ៊ុំ សុភា បានដឹកនាំកម្លាំង បន្តនាំយកស័ង្កសី ចំនួន ១៨៣សន្លឹក រួមនឹងថវិកាមួយចំនួន ទៅឧបត្ថម្ភដល់គ្រួសារប្រជាពលរដ្ឋរងគ្រោះដោយខ្យល់កន្ត្រាក់បក់រលំ និង របើកដំបូលផ្ទះចំនួន ១៤គ្រួសារទៀត នៅភូមិថ្នល់តាសែង ឃុំភ្នំក្រាំងដីមាស ស្រុករលាប្អៀរ ខេត្តកំពង់ឆ្នាំង ។

ឯកឧត្តម មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខ និងចូលរួមសោកស្តាយ ពីសំណាក់ សម្តេចធិបតី និងលោកជំទាវ ចំពោះការបាត់បង់ផ្ទះសម្បែងរបស់បងប្អូននាពេលនេះ ។ ឯកឧត្តម បានបន្តថា សម្តេចធិបតី និងលោកជំទាវ តែងតែគិតគូរពីសុខទុក្ខរបស់បងប្អូនប្រជាពលរដ្ឋ គ្រប់ទីកន្លែង គ្រប់កាលៈទេសៈទាំងអស់ ។ ក្នុងនោះ សម្តេច និង លោកជំទាវ តែងតែឧបត្ថម្ភ សម្ភារ និង គ្រឿងឧបភោគបរិភោគ ជាបន្តបន្ទាប់ សម្រាប់ទុកចែកជូនបងប្អូនប្រជាពលរដ្ឋ ដែលជួបការ និង រងគ្រោះដោយគ្រោះមហន្តរាយផ្សេងៗ ដូចជាបងប្អូននាពេលនេះជាដើម ។ ឯកឧត្តម អ៊ុំ សុភា បានជូនពរដល់ក្រុមគ្រួសាររងគ្រោះ សូមមានសុខភាព ជួបតែសេចក្តីសុខ កុំឲ្យជួបគ្រោះមហន្តរាយ ចាប់ពីពេលនេះតទៅ ។

ក្រុមគ្រួសាររងគ្រោះទាំងអស់ សូមគោរពថ្លែងអំណរគុណយ៉ាងជ្រាលជ្រៅជាទីបំផុតជូនចំពោះ សម្តេចធិបតី និង លោកជំទាវ ដែលជានិច្ចកាលតែងតែយកចិត្ដទុកដាក់ចំពោះប្រជាពលរដ្ឋនៅគ្រប់ទីកន្លែង និងសូមគោរពជូនពរ សម្តេច និង លោកជំទាវ មានសុខភាពល្អបរិបូណ៌ ដើម្បីដឹកនាំប្រទេសកម្ពុជា ឲ្យកាន់តែរីកចម្រើនបន្ថែមទៀត ។