សម្តេចមហាបវរធិបតី ហ៊ុន ម៉ាណែត អញ្ជើញបិទសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ របស់សមាគមឧកញ៉ាកម្ពុជា

នៅរសៀលថ្ងៃសុក្រ ១រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៤ ខែមីនា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញបិទសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥របស់សមាគមឧកញ៉ាកម្ពុជា។

នៅព្រឹកមិញនេះ សមាគមឧកញ៉ាកម្ពុជា បានបើកសន្និបាតបូកសរុបការងារឆ្នាំ២០២៤ និងលើកទិសដៅការងារឆ្នាំ២០២៥ នៅដឹ ព្រេមៀ សេនធ័រ សែនសុខ។ សន្និបាតនេះ ដឹកនាំដោយលោកអ្នកឧកញ៉ា លី យ៉ុងផាត់ ប្រធានសាមគមឧកញ៉ាកម្ពុជា និងមានការអញ្ជើញចូលរួមពីសមាជិក សមាជិកានៃសមាគមឧកញ៉ាកម្ពុជា។

សមាគមឧកញ៉ាកម្ពុជា (ស.ឧ.ក.) គឺជាស្ថាប័នឯកជនតែមួយគត់ ដែលតំណាងឱ្យរូបវន្តបុគ្គលដែលទទួលបានគោរមងារឧកញ៉ាទាំងអស់នៅកម្ពុជា។ សមាគមឧកញ៉ាកម្ពុជា តំណាងឱ្យសំឡេងរួម សកម្មភាពសប្បុរសធម៌រួម និងគុណតម្លៃដ៏ឧត្តុង្គឧត្តម នៃគោរមងារឧកញ៉ាដែលជាសមាជិកទាំងអស់។ សមាគមឧកញ៉ាកម្ពុជា ត្រូវបានចុះបញ្ជីជាសមាគមស្របច្បាប់ និងទទួលស្គាល់ជាផ្លូវការដោយក្រសួងមហាផ្ទៃ នៃព្រះរាជាណាចក្រកម្ពុជា តាមរយៈលិខិតលេខ៥៧៥៩ ប្រ.ក. ចុះថ្ងៃទី២៥ ខែតុលា ឆ្នាំ២០២២។

សមាគមឧកញ៉ាកម្ពុជា ត្រូវបានដាក់ឱ្យស្ថិតនៅក្រោមអភិបាលកិច្ចផ្នែកបច្ចេកទេសរបស់ក្រុមប្រឹក្សាអភិវឌ្ឍន៍កម្ពុជា ដែលមានសម្តេចតេជោ ហ៊ុន សែន ជាប្រធានកិត្តិយស។

សមាគមឧកញ៉ាកម្ពុជា ត្រូវបានទទួលស្គាល់មួយកម្រិតទៀតជាផ្លូវការរបស់រាជរដ្ឋាភិបាល ដោយផ្តោតជាសំខាន់លើភាពជាដៃគូរបស់រាជរដ្ឋាភិបាល ក្នុងការជំរុញលើកកម្ពស់សកម្មភាពពាណិជ្ជកម្ម និងការវិនិយោគនៅកម្ពុជា។

សមាគមឧកញ៉ាកម្ពុជា មានទស្សនវិស័យរក្សា និងលើកកម្ពស់ឧត្តមភាពដដ៏ឧត្តុង្គឧត្តមនៃគោរមងារឧកញ៉ា តាមរយៈការ ចូលរួមអភិវឌ្ឍន៍សង្គម និងសេដ្ឋកិច្ចកម្ពុជាប្រកប ដោយចីរភាព និងបរិយាប័ន្ន បង្កើតបាននូវភាពសុខសាន្ត សុខដុមរមនា និងការរីក ចម្រើនខាងកម្រិតជីវភាពរបស់ប្រជាពលរដ្ឋបានល្អប្រសើរដូចបណ្តាប្រទេសអភិវឌ្ឍន៍នានា។

សមាគមឧកញ៉ាកម្ពុជា មានបេសកកម្មចម្បងៗដូចខាងក្រោម៖
១) ធ្វើជាតំណាងការពារផលប្រយោជន៍ស្របច្បាប់ កិត្តិយស និងសេចក្តីថ្លៃថ្នូររបស់ឧកញ៉ាដែលជាសមាជិក។
២) រួមគ្នាចូលរួមចំណែកក្នុងសកម្មភាពសង្គម និងសប្បុរសធម៌នានា ដើម្បីបង្កើនកិត្យានុភាព ឧត្តមភាព និងគុណធម៌របស់ឧកញ៉ាឱ្យកាន់តែខ្ពង់ខ្ពស់ថែមទៀត។
៣) លើកកម្ពស់ការគោរពច្បាប់ និងលិខិតបទដ្ឋានគតិយុត្តនានារបស់ព្រះរាជាណា ចក្រកម្ពុជា។
៤) បង្កើតវេទិកា សិក្ខាសាលា និងកម្មវិធីផ្សេងៗទាំងក្នុង និងក្រៅប្រទេស ដើម្បីលើកកម្ពស់ភាពជាដៃគូនៅក្នុងសកម្មភាពពាណិជ្ជកម្ម និងការវិនិយោគនៅក្នុងព្រះរាជាណាចក្រកម្ពុជា។

យោងតាមរបាយការណ៍របស់លោកអ្នកឧកញ៉ា លី យ៉ុងផាត់ ប្រធានសាមគមឧកញ៉ាកម្ពុជា បានឱ្យដឹងថា គិតត្រឹមថ្ងៃទី៣១ ខែធ្នូ ឆ្នាំ២០២៤ សមាគម មានសមាជិកចំនួន ៤៤៦រូប កើនឡើងប្រមាណ ២៦ភាគរយ ធៀបនឹងឆ្នាំ២០២៣។ ក្នុងនោះទីប្រឹក្សាជាន់ខ្ពស់៨រូប, ក្រុមប្រឹក្សាភិបាល៤៥រូប, សកម្ម៣៤រូប និងទ្រទ្រង់ ៣៥៤រូប) ដែលមានគោរមងារជាលោកអ្នកឧកញ៉ា ៥រូប អ្នកឧកញ៉ា ១៤០រូប និងឧកញ៉ា ៣០១រូប។

របាយការណ៍បានបង្ហាញដែរថា សមាគមបានចូលរួមផ្តល់ធាតុចូលទៅលើច្បាប់ និងបទដ្ឋានគតិយុត្តនានាជាច្រើន។ ក្រៅពីនេះ សមាគមបានចូលរួមយ៉ាងសកម្មក្នុងការសម្របសម្រួល និងការដោះស្រាយវិវាទក្រៅប្រព័ន្ធតុលាការ ជូនសមាជិក សមាជិកា បានជាច្រើនករណី ជាពិសេសការផ្សព្វផ្សាយចេញសេចក្តីប្រកាសព័ត៌មាន និងសេចក្តីជូនដំណឹងនានា ដើម្បីការពារកិត្តិយស និងសេចក្តីថ្លៃថ្នូរ នៃគោរមវន្ត។

សមាគមឧកញ៉ាកម្ពុជា បាននិងកំពុងបំពេញការងារបានយ៉ាងល្អ និងត្រឹមត្រូវតាមស្តង់ដារ ដើម្បីធានាបាននូវតម្លាភាព សុក្រឹតភាព គណនេយ្យភាព ការសន្សំសំចៃ និងប្រើប្រាស់ចំគោលដៅស្របទៅតាមទស្សនវិស័យ និងបេសកកម្មរបស់សមាគម ជាពិសេស ការគ្រប់គ្រងចំណូល និងចំណាយ ដែលត្រូវបានធ្វើសវនកម្មជាទៀងទាត់ពីក្រុមហ៊ុនសវនករឯករាជ្យ។

សម្រាប់កិច្ចការទំនាក់ទំនងសាធារណៈ អន្តរជាតិ និងធុរកិច្ចវិញ លោកអ្នកឧកញ៉ា លី យ៉ុងផាត់ បានឱ្យដឹងថា សមាគម បានបំពេញការងារយ៉ាងសកម្មលើការកសាងទំនាក់ទំនងជាមួយបណ្តាស្ថាប័នជាតិ និងអន្តរជាតិជាច្រើនប្រទេស និងស្ថាប័ន សំដៅពង្រឹង និងពង្រីកកិច្ចសហប្រតិបត្តិការពាណិជ្ជកម្ម និងវិនិយោគទាំងក្នុងនិងក្រៅប្រទេស តាមរយៈការអមដំណើរសម្តេចមហាធិបតី ក្នុងដំណើរទស្សនកិច្ចផ្លូវការទៅក្រៅប្រទេស និងការអមដំណើរឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងដំណើរបេសកម្មទាក់ទាញ និងជំរុញវិនិយោគនៅក្រៅប្រទេសដូចជាចិន, ថៃ, ឥណ្ឌា, ជប៉ុន, តួកគី, អាល្លឺម៉ង់, អេស្ប៉ាញ, សហរដ្ឋអាម៉េរិក, កាណាដា, បារាំង, ឆែក, និងចក្រភពអង់គ្លេសជាដើម។ ក្រៅពីការងារនេះ សមាគម ក៏បានចុះអនុស្សរណៈ រៀបចំកម្មវិធីវេទិកាធុរកិច្ច និងផ្គូផ្គងពាណិជ្ជកម្មជាមួយបណ្តាស្ថាប័នពាក់ពន្ធនានា ជាច្រើនផងដែរ។

សម្រាប់កិច្ចការសប្បុរិសធម៌ និងការងារសង្គមកិច្ច សមាគមឧកញ៉ាកម្ពុជា ក៏បានបំពេញសកម្មភាពសប្បុរិសធម៌ និងការងារសង្គមជាច្រើនផងដែរ ដែលបានបរិច្ចាគថវិកាអស់ប្រមាណ ៥,៥លានដុល្លារ គឺកើនឡើងចំនួន ៨៧៦ភាគរយ ធៀបនឹងឆ្នាំ២០២៣៕

អត្ថបទដោយ: srey mach